Raunveruleikinn

13. Er þér sama?

Af hverju erum við stöðugt að velta okkur upp úr því hvað öðru fólki finnst? Eigum við ekki bara öll að vera nákvæmlega eins og við erum í friði, hvað svo sem öðrum finnst um það? Ef við viljum ganga með kúrekahatt alla daga, vera alltaf í grænum skóm, já eða baða okkur nakin útí læk - þá skulum við bara gera það! Ingileif og María ræða það hvers vegna við ættum öll að hætta að pæla í öðru fólki og fara að láta okkur vera aðeins meira sama. 

12. Hvað er svona og hvað er hinsegin?

Hvað er að vera svona og hvað er að vera hinsegin? Ingileif og María ræða hinseginleikann í tilefni Hinsegin daga sem fóru fram á dögunum. Hvernig er það að vera hinsegin einstaklingar á Íslandi í dag, og hvers vegna skilgreinum við okkur hinsegin þegar við erum ekkert öðruvísi en næsta manneskja? 

11. Hvað er fjölskylda?

Fjölskyldur eru alls konar. Í þessum þætti fara Ingileif og María yfir mismunandi fjölskylduform og mikilvægi þess að búa til pláss fyrir alls konar fjölskyldur í samfélaginu - ásamt því að ræða sína upplifun af því að skapa fjölskyldu saman.

 

Þátturinn er í boði Domino's og Chito Care. 

10. Sannleikurinn eða kontór?

Í 10. þætti Raunveruleikans fara Ingileif og María um víðan völl og leyfa flæðinu að ráða. Þátturinn er með aðeins öðru sniði en vanalega, og laus í reipunum - en það er líka sumar og það má! Þær rifja upp ýmis bernskubrek og vandræðaleg augnablik, í bland við hinn víðfræga sannleikann eða kontór, SPK - já eða rússneska póstinn. Meira um það í þættinum!

Þátturinn er í boði Domino's og Chito Care. 

9. Viltu giftast mér?

Eftir fjölda áskorana ákváðu Ingileif og María, í tilefni af tveggja ára brúðkaupsafmæli sínu, að helga nýjasta þátt Raunveruleikans þeirri mannlegu athöfn að gifta sig. Giftingar geta verið alls konar og eru jafn mismunandi og fólkið sem kýs að innsigla ást sína með þeim hætti. Hjónurnar fara um víðan föll, ræða eigið brúðkaup og umstangið sem því fylgdi auk þess að rifja upp ýmsar minningar því tengdu. Þátturinn er í boði ChitoCare og Dominos og var tekinn upp í „stúdíó-ömmu“ á Flateyri. 

8. Viltu koma í ferðalag?

Ferðasumarið 2020 er hafið og í þetta skiptið munu líklegast flestir ferðast innanlands. En hvert er skemmtilegast að fara, hvar eru bestu náttúrulaugarnar og er hringurinn í raun hringurinn án mikilvægasta landshlutans? Ingileif og María fara á léttum nótum yfir ferðalög um landið og deila sögum af sínum ferðalögum. Gleðilegt ferðasumar!

7. Hvað er hamingja?

Við leitum mörg hver allt lífið að hinni einu sönnu lífshamingju. En hvað raunverulega gerist þegar við setjum hamingjuna á slíkan stall? Erum við of upptekin við að leita að einhverju, og gleymum að sjá hvað er beint fyrir framan okkur? Ingileif og María ræða um hamingjuna, hvað hún er og hvernig við getum séð hana allt í kringum okkur, ef við erum tilbúin að horfa.

6. Hvað er það erfiðasta sem þú hefur gengið í gegnum?

Kemst einhver í gegnum lífið án þess að lenda í áföllum? Það eru hverfandi líkur á því. Áföll móta okkur og eru oft rót ýmissar hegðunar hjá okkur öllum. María opnar sig upp á gátt um sitt stærsta áfall, og hvernig henni hefur tekist að vinna sig út úr því. Hjónin fara svo yfir það hvað áföll geta kennt okkur og hvernig við getum unnið úr þeim. 

5. Ertu með fordóma?

Fordómar eru víða og eiga sér ýmsar birtingarmyndir. En hvernig upprætum við þá? Í þessum þætti Raunveruleikans ræða Ingileif og María mikilvægi þess að horfast í augu við eigin fordóma, hvers vegna fjölbreytileikinn er mikilvægur og hvernig forréttindi okkar geta oft blindað okkur. 

4. Er ég góð manneskja?

Hvað er það sem gerir fólk að góðum manneskjum? Viljum við verða bestu manneskjur í heimi? Ingileif og María ræða ýmsar manngerðir, hvernig hægt er að leggja sig fram við að verða betri og velta því upp hvað það er sem raunverulega skiptir máli í þessu lífi.